咸爺心中有把秤 寧踢美職唔撐奧運
碧咸寧踢美職唔撐奧運！英格蘭「萬人迷」碧咸落選奧運大軍後悲痛不已，英國傳媒大爆佢決定專心為洛杉磯銀河比賽，唔會全程留守倫敦直擊奧運，隨時留一星期就走。倫敦奧運委員會主席施巴斯坦高爾表明會安排兩個任務畀碧咸，但相信都係無法撫平「萬人迷」無法參戰奧運之痛。
提早返美 免觸景傷情
碧咸仆心仆命幫手爭取奧運主辦權，諗住臨老可以踢番個大賽留下美好回憶，殊不知英國奧運隊主帥皮雅斯唔識做，搞到佢無法圓夢。洛杉磯銀河向來知道碧咸愛國，一早批准佢喺奧運舉行期間缺陣，本來佢會缺席面對FC達拉斯、西雅圖海灣者及美國芝華士嘅賽事，不過，「萬人迷」家陣意興闌珊，勢必提前歸隊。
碧咸落選英國奧運隊後心情低落，但為咗顧全大局，佢仍會喺奧運舉行初期現身撐場。不過，據英國《每日郵報》爆料，「萬人迷」已決定縮短行程，預計唔會睇晒成個奧運，話唔定只留守倫敦一周，之後就會趕返洛杉磯銀河比賽，寧願踢美職都唔喺祖家感受大賽氣氛，可見佢有幾失望。
史高斯戥老友唔抵
對於碧咸未能入選奧運隊，唔少球壇中人都戥佢唔抵，佢喺曼聯嘅老死史高斯近日亦忍唔住出聲：「碧咸冇得踢奧運好唔抵，真係好意外囉，佢咁落力幫手申辦奧運，點知都係冇用。冇計啦，話事嗰個係皮雅斯，我知碧咸好想踢奧運，佢一定好唔開心！」
奧委會兩招補鑊：1.點聖火 2.做旗手
倫敦奧運委員會主席施巴斯坦高爾知道冇咗生招牌碧咸唔掂，強調喺奧運期間仍會重用「萬人迷」：「佢一定會喺倫敦，仲會擔任兩個重要角色，一定唔係做大使咁簡單，佢唔止陪住我哋取得主辦權，仲會一齊迎接光榮一刻。」施巴斯坦高爾唔肯講會搵碧咸做乜，據當地傳媒揣測，佢有機會擔任持旗手，亦有可能負責點聖火，無論做乜都好，點都冇落場踢波咁開心囉。
父子兵亮相《地獄廚房》
「萬人迷」喺英美兩地都咁受歡迎，連帶囝囝囡囡都紅埋。日前就帶埋大仔布魯克林上咗戈登拉姆齊嘅美國電視台節目《地獄廚房》做嘉賓試菜，有參賽者知道將會煮畀碧咸，竟然開心到對住鏡頭大講粗口，搞到一邊食緊嘢嘅布魯克林鬼死咁尷尬。至於細女夏柏舒芬就喺英國被選為「最時尚名人之後」，正好係剛於星期二慶祝一歲生日嘅最佳生日禮物。
SUPPORT DAVID BECKHAM !
頁:
[1]