陳勇成民建聯副主席大熱
【明報專訊】立法會第一大黨民建聯下個月中改選，主席一職應該係譚耀宗冧莊，反而兩個副主席空缺有變動，劉江華去咗做副局長，佢個副主席位應會由秘書長彭長緯頂上；另一副主席位置，原以為陳克勤係大熱，點知爆出黨內屬意陳勇升任。勇哥近期人氣急升，啱啱做咗港區人代，好快應該可以喺黨內「升呢」，真係恭喜晒。另一副主席空缺料彭長緯頂上
民建聯領導層嘅中央委員會，新一屆有52個名額，據知民記玩差額選舉，有約60人報名競逐。話雖如此，黨內大佬對主要領導人選已有共識，民記會設5個副主席，原有蔣麗芸、張國鈞、李慧琼應該順利連任，另一空缺如無意外由彭長緯頂上，陳勇嘅名就係近期爆咗出嚟。
據知民記內部有討論，最後一個副主席位置，可以由後生仔頂上，如陳克勤、陳恒鑌、葛珮帆等都可考慮，但最後覺得佢哋兼任立法會議員，不如搵個實幹型嘅人做後勤支援，所以揀咗陳勇。
講開民記，佢哋嘅立法會議員做咗份工作報告《建報》，呢啲刊物梗喺獨沽一味唱好。《建報》就搞gimmick，用「Kam-lam Style」形容陳鑑林，讚佢喺反對派眼中係死硬建制派，但係九龍東街坊眼中嘅好議員，形容佢好有style喎。
至於喺立法會以大聲聞名嘅蔣麗芸﹙Ann姐），就話繼續要發揮「俠女」風範，繼續抱打不平咁話。Ann姐話唔會嬲網民惡搞喎，仲拋出自己嘅英文格言，話要以理服人，佢話，「If you want to make peace, you don't talk to your friends. You talk to your enemies.」咁話。
http://news.sina.com.hk/news/20130327/-3-2928523/1.html
頁:
[1]