斑馬魚助監察水質
水務署鄧其禮話，每條斑馬魚會「服役」約1個月，24小時檢測濾水廠水質。倘若佢哋游得慢咗又或者突然死亡，系統會發出警告同發出短訊通知職員。（邱雅錡攝）
【明報專訊】東江水間唔中就傳出有污染疑雲，搞到市民心驚驚。水務署半年前開始，派出對污染物極敏感嘅斑馬魚駐守濾水廠，配合發光菌嘅「快速毒性檢測」，可以及時發現水質問題，即時阻止問題食水流出廠，市民用水可以更放心。
水務署水務化驗師鄧其禮話，佢哋會喺濾水廠監測水質嘅位置，放下5條比食指仲要短嘅斑馬魚，然後以每秒拍20張相嘅速度，用電腦全程監視魚仔嘅狀態。若電腦發現魚仔有唔正常，例如游快咗、游慢咗，甚至翻肚死咗，都會自動用短訊或者打電話告知工作人員。
工作人員收到警告後，就會用發光菌做「快速毒性檢測」，1個鐘可以檢測超過1000種有害物質，若發光菌唔識發光，水質就有問題；若重複驗水有問題，濾水廠人員當然會做嘢，確保問題水唔會流出。鄧其禮話，一般東江水流入濾水廠，都要處理約3個鐘，新技術只要兩個鐘就可以確定水質有無問題。
http://news.sina.com.hk/news/20130409/-3-2938187/1.html
新加坡一早使用此技術{:sowhat:}
頁:
[1]