政情：李卓人餐廳擦鋪勁
碼頭業職工會總幹事何偉航（左起）、職工盟總幹事王宇來同職工盟秘書長李卓人喺意大利餐廳食餐「好少少」嘅（徐家浩攝）上星期五（5月3日）喺金鐘太古廣場內嘅一間意大利餐廳，我哋竟然發現支持碼頭工人罷工嘅職工盟秘書長李卓人（阿人）、職工盟總幹事王宇來及碼頭業職工會總幹事何偉航喺度開懷大嚼。呢個場面同係報紙電視上抗爭嘅情景好格格不入，莫非佢哋頂唔順，要去擦番餐勁嘅？
香港國際貨櫃碼頭工潮進行咗三十幾日，工人嘅罷工行動不斷升級，由最初留守碼頭抗議，變到喺碼頭外紮營露宿，之後仲移師去中環長江集團中心外過夜添，總之工人不停爭取自己嘅權益，期間唔係參與集會，或瞓喺帳篷入面，就喺個帳篷入面食飯盒。不過，阿人等嗰日就去咗食意大利餐喎。
上庭午休 三人食四百幾蚊
我哋上星期五中午喺太古廣場嘅意大利餐廳，見到阿人、王宇來同何偉航喺度開餐。三個人叫咗一個肉腸薄餅、一碟茄汁意粉同一碟海鮮意粉，三個人分嚟食，佢哋仲一人一杯意大利咖啡添。乜阿人佢哋唔係應該同班工人們共進退咩？阿人就話，佢哋嗰日要喺金鐘高等法院上庭，期間有一個半小時午飯時間，咪去附近食餐便飯囉，過程中除傾官司嘅事外，仲有講到貨櫃碼頭工人罷工行動嘅問題。餐飯食咗四百幾元，由佢嚟畀錢，佢話兩位同事喺呢段時間都辛苦，成日捱更抵夜，所以食餐好少少，當稍作休息都係應該喎。
不過，呢餐飯真係幾豐富喎，係咪諗住慶祝定單官司會勝訴呢？阿人就話，官司勝訴與否真係好難講，但無論點都要食飯啦。至於工潮方面，佢就話進展係點，要視乎班工人接唔接受資方嘅條件。但依家資方又唔肯去談判桌上傾，話咗加人工，但又好似冇乜表示，所以咪搞到啲工人對公司冇晒信心咁話。
其實，今次貨櫃碼頭工人嘅罷工行動由三月尾經已開始，最初只有三百多人參加，之後高峰期有成幾千人加入。上個月，勞資雙方曾經好似傾掂咁，但最終又不歡而散。唔知阿人下次會唔會請晒所有罷工工人食意大利餐呢？
東方日報
頁:
[1]