九巴好車長獎金$18.93
員工鬧孤寒 九巴：普遍支持
【明報專訊】打工仔當然希望公司派嘅獎金愈多愈好，不過Emily近日喺網上發現一份九巴通告，話九巴發放咗今年度良好服務年獎嘅獎金，共有2378名車長拎到，而位位各得到18.93元獎勵！無錯，係18.93元，喺物價騰飛、餐蛋飯都賣128蚊嘅年代，真係連麥當勞餐都買唔到，難怪有車長鬧爆九巴孤寒。
倘3被投訴 扣獎金撥現金池
汽總九巴分會主任鄭慧君同Emily講，車長月薪係連埋一筆良好服務獎金，每個月約1700元，平時車長無畀乘客投訴就當然袋袋平安，但一有乘客投訴，九巴會先口頭警告，若被投訴3次以上，車長就會被扣半個月獎金，即800幾蚊；扣咗筆錢就撥落「現金池」，直至每年6月拎出嚟攤分畀過去一年無被投訴嘅車長。據知，去年良好車長每人得到嘅獎金係40大元。
工會：應另撥獎金獎勵
九巴員工協會副理事長郭偉光話，雖然呢個制度實行多年，但一直都覺得唔公平。佢認為，如果九巴要獎勵車長，應該額外撥一筆獎金，而唔係扣其他車長嘅工資；加上好多時車長都係無辜被投訴，「例如個乘客入少咗錢，車長叫佢入番，就被人投訴無禮貌」，令好多車長承受好大壓力。
九巴回覆話，每年平分嘅額外獎金愈少，就代表過去一年車長嘅整體表現愈好，愈多車長獲發每月嘅良好服務獎金，又話車長普遍支持呢個做法。
http://news.sina.com.hk/news/20130617/-3-2994772/1.html
有賞有罰好正常.
頁:
[1]