民主黨整「呃人Man」落區
民主黨噚日午飯時間帶「呃人Man」去政府總部對開天橋同港鐵內，唔少公務員都用手機拍低佢哋嘅波士。（葉家豪攝）
偕4個「傑出梁粉」模型七一遊行
【明報專訊】民主黨自從成立咗「創意媒體部」後動作多多，佢哋喺上年七一遊行就創作咗部「梁振英泡泡機」，畀遊行市民「篤破」特首（CY）嘅大話，今年就繼續以CY做靈感，將CY個樣key咗落個巨型鐵甲奇俠（Iron Man）模型度，仲借Iron Man嘅諧音，將佢取名為「呃人Man」！
創媒部部長黎敬瑋話，佢哋總共創作咗5個模型，除咗梁振英之外，其餘4個都係唔會令大家失望嘅「傑出梁粉」，仲話會分別以唔同造型亮相。至於係蜘蛛俠定蝙蝠俠呢，佢就三緘其口，話要保持神秘。
黎敬瑋話佢哋花咗兩個星期設計呢幾款模型公仔，七一當日5款模型會一字排開齊齊亮相，但未來兩個星期先帶佢哋搭吓地鐵落吓區，呼籲大家密切留意。
Emily就擔心，一班Iron Man嘅粉絲見到民主黨咁樣惡搞佢哋嘅偶像，會受唔住刺激囉。
阿富九折證婚 優惠遊行者
另一邊廂，建制派今年喺七一大搞慶回歸party，仲有食肆商店提供優惠，但民主派其實都一樣，搞優惠吸引人上街遊行。冇做議員後專注搞證婚服務嘅鄭家富，噚日就喺facebook宣布，任何準新郎新娘只要參與七一遊行並影張相作證，就可得到證婚九折優惠，鄭家富都幾有生意頭腦，唔知呢個甜頭有冇用呢？
http://news.sina.com.hk/news/20130620/-3-2997485/1.html
應該先貼民主黨高層張相先{:titter:}
頁:
[1]