林鄭黨慶酒會勇救民記招牌
民建聯噚日喺黨慶酒會切蛋糕慶祝，但係過程就唔多順利，一眾主禮嘉賓包括中聯辦主任張曉明（左起）、特首梁振英、民建聯主席譚耀宗、民建聯監委會主席楊孫西、政務司長林鄭月娥切蛋糕時，成個民建聯黨徽就倒下。但林鄭好快手，立即扶番正。財政司長曾俊華（右）喺旁邊睇熱鬧（圖片來源：明報）黨慶切蛋糕險出事
【明報專訊】民建聯成立21周年，噚日一如以往喺中環美心搞酒會。作為堅實支持政府嘅政黨，對特首兩脇插刀支持，官員梗係畀面到齊，特首梁振英、政務司長林鄭月娥、財政司長曾俊華以及一眾高官都有現身，中聯辦主任張曉明當然有捧場。正當一眾主禮嘉賓好開心為民建聯切生日蛋糕，手起刀落時，喺蛋糕上嘅D字民記會徽隨即向後跌，好彩林鄭眼明手快扶番正。
特區高官到齊
話說梁振英拎住把刀，其他主禮嘉賓張曉明、民建聯主席譚耀宗、民建聯監委會主席楊孫西等齊齊拿住把刀時，喺大蛋糕頂嘅D字突然向後跌，喺旁邊住嘅財政司長曾俊華面露驚訝，好彩林鄭月娥反應好快，立即出手扶住；台上嘉賓尷尷尬尬咁擺番好個D字就當無事喇。
曾鈺成：識得起番身
立法會主席曾鈺成見慣風浪，佢話今次事件就好似民建聯成立21年以嚟咁，都輸過好多次，但最重要係跌落地都識得起番身，否則仲大件事。
譚耀宗致辭時話，香港人同坐一條船，但家有人不斷爭拗，亦有人不斷搖晃船身，民建聯就正好努力咁穩住船身，希望條船可以繼續前行。佢又話，民建聯喺政改問題上願意同各黨派溝通，協商一個符合《基本法》、人大常委會決定，香港人又接受嘅方案咁話。
明報
頁:
[1]