(南區巴士線重組)建制派搞對抗 區會流會
【明報專訊】18區區議會，基本上都係建制派佔多數，但估唔到「搞對抗」者係佢哋！噚日南區區議會轄下嘅交通及運輸事務委員會開會，傾區內巴士路線重組，身兼區議會主席嘅朱慶虹，話唔滿意運輸署嘅回應，好激動咁拉埋民建聯等一眾議員玩集體離場抗議，反而民主派議員乖乖坐喺度「食花生」睇戲，結果會議唔夠出席人數，南區區議會嘅會議要首度流會。稱想撐政府都好難
朱慶虹事後都補飛話，建制派都係支持政府，「唔係搞對抗」，但指部門嘅地區工作做得好唔掂，「建制派想支持政府都感到好困難！」噚日嘅會議，係傾港鐵南港島線及西港島線建成後，南區巴士線重組，要削200架巴士。
朱慶虹話，佢哋唔係反對重組，但政府上年話請顧問公司做研究，佢當時已同運輸署講，叫顧問公司落區跟議員同市民傾傾，話運輸署當時話好，但佢話問過所有議員，全部都話無人諮詢過佢哋，然後收到份顧問報告。
佢噚日話想問顧問公司點樣做到咁嘅研究結果，運輸署話顧問合約已完結，顧問唔會上區議會，搞到佢哋好嬲喎，所以就集體離場，抗議政府唔尊重區會。
明報
頁:
[1]