工聯會月初深圳搞總結會
北上減引誘 開會更專心有議員趁暑假離港叉電，亦有人把握時間落區接觸市民爭取支持，其中向來好多fans嘅工聯會榮譽會長陳婉嫻，最近就趁唔使開咁多會游走香港各處，包括去堆填區視察、睇洪水橋發展等。而工聯會整體亦唔鬆懈，據聞政務委員會決定本月初會同立法會議員、區議員等上深圳搞總結會，檢討番佢哋嘅議會工作。
沒京官南下放話
點解開會都要北上？工聯會中人話大家唔使諗太多，今次總結會唔會有京官南下向工聯會放話，唔喺香港開會只係希望各人專心啲，減少受到引誘啫。工聯會最近立場比較難捉摸，唔知今次會唔會講吓日後應對政府嘅策略呢？
除咗開會，陳婉嫻最近亦好忙，佢話日前走入下白泥等地視察屯門堆填區對附近居民影響，仲坐埋有許可證嘅車深入堆填區，佢話已經向環境局建議，應該起條隧道經山路將垃圾運入堆填區，咁樣對居民影響最細，當局亦有正面回應。
除咗屯門堆填區，嫻姐話佢計劃去打鼓嶺、將軍澳堆填區，又打算入古洞、受高鐵影響嘅牛潭尾村等地，睇吓受新界東北發展影響嘅地方。
明報
頁:
[1]