指其對港悲觀 戴耀廷勸周融移民
周：居英權一早有喺手【明報專訊】「佔領中環」發起人戴耀廷與「幫港出聲」周融，就佔中再來一輪舌戰。周融話，香港管治出現問題，源於呢一代人憎中華人民共和國，所以可能要等20年、30年、40年，等港人接受中共有進步、都唔係咁差，問題就會改變咁話。戴耀廷見到周融對香港咁悲觀，忍唔住插嘴勸周融，「咁我諗，周生，你不如移民啦」。周融條氣唔順，反駁話「我哋啲咁嘅人，咁嘅年紀，居英權一早有喺手啦，但係我唔知揼咗去邊之嘛」。
電視對談針鋒相對
兩人出席有線電視《新聞刺針》節目對談，戴耀廷當然係話，搞佔中目的係想有普選，所以其實佢最唔想有佔中，提出佔中係「先小人後君子」提醒政府。周融就話，戴耀廷係「先君子後小人」，反而佢哋反佔中，「我就喺先君子後君子」。
周融喺對談中話，「我亦都好希望戴先生，如果你得到你（想要）嘅民主、普選方法，早啲宣布唔使搞佔中運動，咁我覺得非常之好」。周又話佔中若成功，佢會移民。不過，佢喺對談中又話自己早就有居英權，但唔想移民。Emily都聽唔明，究竟周融想唔想移民？
戴周再辯君子小人
講番佔中，周融話戴耀廷籌劃第一波、第二波或第三波嘅佔中行動，質疑戴係咪想搞無政府狀態。戴耀廷反問，點解會無政府，戴話佢哋一班人去中環坐，跟住會畀警察拉走，然後保釋返屋企，社會運作依舊，如果政府仍然唔聽意見，下一波先至會發動唔買餸、唔返工等運動。
二人雖然針鋒相對，但最後戴耀廷話，最緊要佢哋都係理性討論，互相尊重，所以大家握手道別。
明報
頁:
[1]