何柱國話戴耀廷肥咗
稱暴發戶有3種【明報專訊】唔少人都話佔領中環發起人之一戴耀廷搞佔中後，因操勞瘦咗成個碼，不過，星島集團主席何柱國噚日喺《東周刊》10周年活動上被記者問佢點睇佔中時，佢就話覺得戴耀廷近半年「肥咗」。至於點解？何柱國諗咗一諗，話暴發戶有3種，第一種係啲忽然有錢嘅人，第二種係以前無做官、一朝做官就不可一世嘅政治暴發戶，第三種暴發戶就係啲出鏡出得多嘅人，以為自己好威、上咗腦嘅人。至於邊樣先係戴耀廷「致肥」原因，何柱國叫大家自己諗。
戴：本住公義行事
戴耀廷無諗過自己肥瘦都會引起話題，佢噚日同Emily講，自己都係本住對認知嘅公義理念行事。Emily想到反佔中團體「幫港出聲」嘅周融近排都頻頻曝光，唔知有無「肥」到呢？可惜何柱國話近排唔喺香港，無留意周融。不過唔緊要，事關周融噚日亦有去同一活動，仲講明要去「抽水」，不停向其他嘉賓派卡片宣傳幫港出聲，其中一個被抽水嘅商台行政總裁陳志雲就有啲無奈咁同Emily講，可能自己水腫啦。
周融：佔中成功唔會移民
周融前排接受電視訪問時話，如果佔中成功佢要移民，佢噚日就澄清自己唔會移民，又話自己揼咗居英權好耐，但如果香港動亂，佢會離港避一避，例如搬上內地三五日，或者去朋友屋企避一避，仲話自己喺全世界好多地方都有朋友！
明報
頁:
[1]