民建聯投訴畀橫額誹謗
【明報專訊】現時唔同類型嘅橫額隨處可見，有時甚至幾阻礙駕駛者視線，噚日民建聯漁農界何俊賢喺立法會提出質詢，問有關非法懸掛橫額嘅事，特別問到近年常有人喺食環署巡邏人員收工後，喺公眾地方掛匿名或冒名、含有誹謗內容嘅橫額，要求當局交代點跟進。原來佢係為民建聯伸冤，因為近年經常有人惡搞民建聯。高永文﹕無收投訴
不過，食物及衛生局長高永文回應提問時就話，過去3年食環署無收到有關非法橫額含有誹謗內容嘅投訴，又話如有投訴，佢哋會依法辦事。
但民建聯主席譚耀宗就隨即話民建聯係受害者，不時發覺各區都有違規橫額，內容有誹謗性質，做政治抹黑，佢話該黨同事都會即刻投訴，佢對於高永文講到咁「太平盛世」話無收投訴，就好懷疑。
高永文就繼續話，收到投訴都係講佔據位置、阻礙行人等，但無針對橫額內容嘅，佢話今年4月起已加強執法，單係今年4至9月，就有超過1200張橫額因未經准許被當局移走。
自由黨航運交通界易志明就話，政府不如加重違例掛橫額罰則，但高永文話無可能百分百杜絕呢個問題，暫時無打算修例。
明報
頁:
[1]