戴耀廷：商討日熱烈過導修
馬嶽仍保留爭「88直選」檔案「佔領中環」行動噚日舉行第四場商討日，到全港七大院校同步舉行「大專學界商討日」，5個鐘嘅討論無損同學議政熱情，佔中發起人之一戴耀廷噚日喺中大商討日就話，商討日會上癮，仲話同學傾佔中仲熱烈過平時上導修課。
唔怕學生三分鐘熱度
同學討論雖熱烈，但會唔會三分鐘熱度？戴耀廷話唔太擔心，仲話佢噚日先發現，當年學生年代同佢一齊爭取「88直選」嘅中大政治與行政學系副教授馬嶽，依家仲保留住當年嘅宣傳file，加上商討日討論咁深入，相信同學參與得就唔會輕易放棄。
研究街頭快閃商討
嚟緊呢個星期商討日會擴展到教協同基督徒團體，月尾一班金融界工作者仲會商討到去蘭桂坊。戴耀廷話明白商討日時間太長，未必人人可以坐足幾個鐘，未來可能會展開街頭3分鐘快閃商討。
戴耀廷話，近日相繼有反佔中組織出嚟唱對台，唔使怕佔中會被丟淡，重要嘅係商討日係咪可以「落地」，而唔係爭取媒體報道。不過，Emily聽聞不時炮轟佔中嘅左報就好重視，甚至所有佔中活動都派人採訪，做到滴水不漏。
明報
頁:
[1]