曾主席唔趕大嚿成磨心
CY被鬧「狗樣」 建制叫裁決【明報專訊】噚日行政長官答問大會最肉緊一幕，應該係人民力量嘅陳偉業（大嚿）就菲律賓人質事件大罵特首梁振英（CY）「狗樣」。此言一出，不止大嚿被建制派議員圍插，連立法會主席曾鈺成都慘被拖落水變成磨心，建制派及黨友對住曾主席都無面畀，鬧佢唔做裁決，無要求大嚿收回言論，又唔趕走大嚿，做法唔公道。
黃國健教主席做嘢
大嚿鬧特首，話係因為梁振英早排見菲國總統阿基諾三世件事，「我咁憤怒係因為見你個狗樣，見到嗰個總統時傻笑，我至咁憤怒」。民建聯黃定光先睇唔過眼，發言投訴大嚿言論冒犯。其後工聯會王國興同黃國健，加埋民建聯葉國謙就「唱三簧」要曾主席裁決。不過，曾鈺成不為所動，無趕走大嚿，最後黃國健乾脆教佢做嘢，「你身為主席，應該係主持立法會會議嘅秩序，頭先葉國謙議員已要求你裁決呢件事，你根本就無做到裁決，呢件事到底能否用呢個詞語？用咗呢個詞語又應唔應該收回？你根本無任何行動」。
最抵死係社民連梁國雄都插嘴話佢幫大嚿，「立法會係唔可以侮辱狗嘅，因為用狗嚟形容梁振英，實際上係侮辱咗狗」。CY聽到木無表情，曾主席就皺晒眉。
咁樣對罵就浪費咗4分鐘，難怪曾鈺成最終都忍唔住訓話，「各位議員……我相信睇直播嘅公眾人士、我哋嘅市民，都希望聽到議員嘅提問同行政長官嘅回應……而唔係聽我哋議員喺度互相辱罵」。
明報
頁:
[1]