葉劉網民就港視問題fb過招
為免費電視牌【明報專訊】身兼行會成員嘅新民黨主席葉劉淑儀，連日就行會處理免費電視牌照一事講咗唔少說話，亦因佢為維護行會決定，噚日喺facebook同網民舌戰。
有網民問葉太在發牌一事，「問心，對得住良心嗎？」葉太則用英文留言反駁，話基於公眾利益而作出嘅決定，「I am satisfied（我感滿意）」。
葉太：沒走後門避記者
葉太噚日本來喺fb留言，解釋周二佢出席行會時，並非如傳媒所講走後門避見記者，而係當時剛巧特首就電視發牌事件發表講話，佢不得其門而入，更喺門外「罰企」咗數分鐘，之後特首辦保安就引領佢從側門通道入特首辦內開行會，會議後佢亦從正常途徑離開，所以諗唔到今次會產生小誤會，被人以為走後門。
葉太留言後都有唔少網友支持佢，但亦有人乘機表達對發牌事件嘅不滿，有人甚至唔客氣地叫佢交代真相，否則下屆選舉情願投白票都唔會選佢！
葉太就用英文留言話「I stand by my principles（我持守原則）」，希望唔同意佢嘅人能尊重佢表達意見嘅自由，因為呢啲係香港核心價值。
明報
頁:
[1]