發叔有火 鬧自由行政策
立法會開始《施政報告》動議辯論，最近盛傳有意組黨嘅鄉議局主席兼經民聯立法會議員劉皇發（發叔）突然好有火。發叔搶閘第二個發言，唔知佢係咪要展現組黨嘅霸氣，噚日仲好似毓民上身咁，不斷用四字詞批評政府自由行政策，話政府缺乏前瞻，居安未能思危，佢仲燒埋港鐵，話港鐵「只顧利益，罔顧市民負擔」。搞到奶粉荒 產房爆滿
發叔一向好少喺立法會發言，之前佢先「處男下海」，22年來首次喺立法會提出動議，要求將大浪西灣剔出新修訂嘅郊野公園範圍，雖然動議不獲通過，但大家對發叔已經刮目相看。而噚日發叔發言評論施政報告，當大家都以為佢只會輕描淡寫，佢就嚇你一跳，批評政府推出自由行時無未雨綢繆，又無及早評估旅客對香港市民嘅影響而制定對策，結果搞到奶粉荒同產房爆滿，政府先「如夢初醒，手忙腳亂地亡羊補牢」。
批港鐵只顧利益 罔顧市民
發叔點名商經局長蘇錦樑，話佢叫市民等多班車嘅言論係輕描淡寫旅客數目太多嘅問題，「睇唔到政府有經一事長一智嘅覺悟」。唔知係咪有好多新界人同佢反映交通費好貴呢，發叔未組黨先為新界人發聲，話如果將來有新鐵路，係咪仍然交由「只顧利益、罔顧市民負擔嘅港鐵公司，或者引入新公司營運？」
另一建制派、工業界林大輝一向鬧政府唔多留情面，噚日仲話唔會撐成立創新科技局，除非有一個清晰發展目標同理想局長人選。佢又話政務司長林鄭月娥忙於搞政改，唔得閒再幫啲局長擋箭，所以佢話最好等政改成功後再搞科技局。
明報
頁:
[1]