傳楊崢撬黃佩霞牆腳 妙芝：係事實嚟
楊崢和黃宗澤（Bosco）的「崢澤戀」被踢爆後，楊崢慘被圍攻，對於她被傳當年撬懷孕的黃佩霞牆腳，歐陽妙芝昨日出席活動時坦言︰「係事實嚟！」而被指是「小三」的楊崢則說︰「唔係事實嘅唔回應，當事人已經否認咗。」談到被指與Bosco情變時，她說：「冇咁嘅事！」
本月初黃宗澤和楊崢被踢爆秘戀3個月，「崢澤戀」熱爆全城，雖然二人發展迅速，並流出公然咀嘴的照片。不過楊崢自公開戀情後慘遭萬箭穿心，除被指虛報年齡外，又傳出是當年介入懷孕的黃佩霞與男友戀情的「小三」，近日又有傳因為太多負面新聞，令她與Bosco的戀情告急。昨日事情再有新進展，名模歐陽妙芝為now電視節目擔任嘉賓時就爆大鑊，直指楊崢當年介入，而令黃佩霞被男友拋棄，又暗寸對方人緣差。
記︰記者 芝︰歐陽妙芝
記︰你同楊崢、Bosco熟唔熟？
芝︰（藐爆）我冇佢（楊崢）電話，你話熟唔熟？同Bosco試過一次一齊做嘢。呢排好多人講佢哋嘅新聞，聽到唔想聽，見到封面都唔想睇。
記︰你覺得楊崢人緣差？
芝︰你哋覺得呢？我都想聽吓喎！其實我唔係好知，我同佢傾過幾句偈都數得出，我唔係咁想提佢，一陣佢話我攞佢嚟宣傳就唔係咁好意思啦！
記︰當年有傳楊崢搶黃佩霞男友搞到佢哋分手？
芝︰我哋當年有陪住佢（黃佩霞），見到個姊妹咁樣喎······真係可以令男人拋妻棄子，可以想像到呢個人係有幾······唔想講。
記︰咁你係咪指楊崢做第三者係事實？
芝︰要問番黃佩霞，講過啦！係事實嚟！尋日我哋同黃佩霞、伍詠薇茶餘飯後都係講佢。
記︰覺得Bosco點？
芝︰我諗佢幾Nice，一齊做嘢我個仔鍾意車，仲上咗佢架車玩。
記︰叫Bosco睇定啲先？
芝︰呢個唔係我責任嚟，呢個係佢父母責任。
記︰Bosco同陳嘉容之前傳緋聞？
芝︰女嘅係窈窕淑女君子好逑，男嘅就甜言蜜語。
記︰Bosco口花花？
芝︰冇，嗰時一齊做嘢陳嘉容同佢好冧咁傾偈，總之愛情呢樣嘢係好難控制。
「主角唔方便講」
對於被歐陽妙芝指是「小三」的言論，楊崢昨日在電話中無奈地說︰「唔係事實嘅唔回應，當事人已經否認咗。」昨午她做完電台節目後被問到與Bosco情變傳聞時說︰「冇咁嘅事！唔再回應喇！」說罷便駕駛Bosco的古董車離開。另一邊廂，Bosco對於被歐陽妙芝指曾跟陳嘉容親密傾偈，關係曖昧，他昨晚以短訊回覆︰「同陳嘉容只係朋友，其他事唔回應。」而他昨午在電視城拍攝新劇時，笑笑口回應與楊崢情變的傳聞︰「我唔識回應，睇報道先知，唔知件事會演變成點。」問到黃媽媽是否「詐型」？他說︰「連我自己都唔知，見都冇時間見，冇機會『哦』！睇完開心吓笑吓就算。」
其後黃佩霞否認當年分手與第三者有關，昨晚記者再致電歐陽妙芝，她說︰「唔好提，講過就算，故事主角（黃佩霞）好多嘢唔方便講，我只係將知嘅嘢同大家分享，我同其他Model有傾過，大家都覺得煩，唔想同佢個名拉埋一齊。」問到會否擔心跟楊崢結怨？她說︰「唔會，我同佢冇瓜葛，我冇講過任何唔好嘅嘢，冇批評過佢。」
全職媽咪97年港姐
歐陽妙芝為香港著名模特兒，1997年參選香港小姐，但三甲不入。擁有高挑身形的她，其後進軍模界，曾與男星雷宇揚拍拖，與她同期的模特兒還有黃佩霞、陳嘉容及周汶錡等。妙芝於2004年下嫁金融界才俊，婚後相夫教子，育有兩子的她現時為全職媽媽。
太陽報
頁:
[1]