李偲嫣送寫真畀「AV仁」睇
民主黨（白鴿黨）立法會議員何俊仁（鐵頭仁）喺立法會聽取財政司司長曾俊華宣讀財政預算案時，公然喺會議廳瀏覽日本水着女星同多位內地年輕女模特兒嘅性感照片，仲畀多間傳媒影低咗佢嘅「罪證」。鐵頭仁貪一時之快換嚟斷不了嘅手尾，除咗畀網民嘲笑佢為「AV仁」之外，仲要面對白鴿黨嘅紀律處分，依家仲有婦女組織聲言要狙擊鐵頭仁，話要送本寫真集畀佢返屋企睇，等佢唔好喺立法會大庭廣眾下睇，教壞細路咁話。
去信投訴睇艷照冇回音
鐵頭仁上周三喺聽預算案期間睇艷照，引起全城爭議，搞到白鴿黨都要即刻做嘢。該黨嘅紀律委員會喺事發後兩日、即上周五召開紀律聆訊，要求鐵頭仁作出交代，依家仲未有調查結果，鐵頭仁會唔會被開除黨籍都仲係未知數。另一邊廂，鐵頭仁嘅行為惹嚟婦女組織關注，佢哋仲會發起狙擊鐵頭仁行動。
話說「正義聯盟」召集人李偲嫣尋日話，佢早排已就鐵頭仁開會睇艷照事件去信畀鐵頭仁及多位立法會議員投訴，要求佢哋喺七個工作天內回覆。不過至今都未有議員覆信，所以聯盟就諗緊下一步行動，例如會送寫真集畀鐵頭仁，等佢可以匿埋屋企睇。咁寫真集嘅「主角」應該係邊啲佳麗呢？佢就話會搵啲亞洲佳麗畀鐵頭仁，因為相信以鐵頭仁嘅身形，應該比較鍾意亞洲佳麗，歐洲佳麗太高頭大馬喎！
關心何太 想邀入「聯盟」
李偲嫣亦都好關心鐵頭仁嘅太太，話擔心鐵頭仁有性沉溺，如果識得何太就會介紹佢加入聯盟嘅婦女組，希望可以關心吓佢。鐵頭仁做出啲咁嘅醜事，政治生涯分分鐘都會受到影響。李偲嫣就話，公民黨梁家傑都試過喺立法會睇少女性感照片，如果何梁下屆唔做議員，可以成立「亞洲模特兒中心」，將來話唔定會有「輝煌事業」喎。
我哋就問過鐵頭仁點解冇覆李偲嫣嘅信。鐵頭仁就話收唔到佢封信，亦都唔知李偲嫣送書係咩意思。睇嚟鐵頭仁唔想被狙擊嘅話，都係留喺屋企避避風頭好啲喇。
東方日報
頁:
[1]