公民黨與外傭案律師 幕後關係拆解
外傭爭居留權單嘢，全城議論紛紛，小弟早兩日同親友飯局，席上有個十一歲華仁仔，係少有嘅新聞迷，日日刨報紙港聞，有人特別問佢點睇呢次事件，佢眼仔一睩後答：「梁家傑話冇乜問題，錯啦！如果外傭可以攞居留權，香港會沉o架！」估唔到細路嘅識見，仲高過梁大狀。今次平地起風波，好多人認為公民黨係幕後推手，罵聲此起彼落，該黨高層亦覺形勢愈嚟愈唔妥，日前再度聲稱同案件無關，只係有黨員履行職業責任啫。但無論班友點講，都好難完全劃清界線，因為公民黨同呢單官司嘅律師有千絲萬縷連繫，立場亦好一致，可以話同一個陣營。
負責今次訴訟嘅大狀李志喜（前大法官李福善千金），同公民黨核心幾個大狀余若薇、梁家傑、吳靄儀等一直係親密戰友，○三年時佢哋齊齊組成《基本法》二十三條關注組，推動反二十三條大遊行，其後又聯手搞「四十五條關注組」。到二○○六年，呢幾個大狀正式成立公民黨，李志喜又係創黨成員，做過執委，長期都參與核心決策，經常同其他高層閉門開密會，與余若薇等平起平坐。現時佢仍然擔任黨內憲制及管治支部嘅副主席（秘書係吳靄儀）。
外傭案另一個主要角色帝理邁（Mark Daly），亦同公民黨關係密切。據本刊掌握嘅○六年黨員百人名單，阿Mark亦喺裏面，可以話係創黨黨員，但一直好低調。佢原籍加拿大，九五年嚟香港執業，專打人權官司，故早與公民黨幾個大狀稔熟，○三年參加咗「四十五條關注組」，其後一齊組公民黨，亦係核心分子，到年前至退黨。
阿Mark早年協助專打越南難民官司嘅人權律師貝嘉蓮，後來貝嘉蓮病逝，佢就接手其人權官司，同今次案件另一律師合組律師行主攻呢瓣，近期唔少政治難民案都同佢哋有關，另一傑作係領匯上市時幫「牙籤婆婆」打司法覆核案。
知情人士指，公民黨高層面對咁嘅形勢，決定做三樣嘢：第一係高調否認有份搞呢場官司，避免被火燒上身；第二係唔評論外傭要求是否合理，盡可能收口；第三係淡化問題，強調就算外傭勝訴，影響亦唔大，只係政府嚇人啫！關於第三點，前高官同法律界已紛紛反駁，指佢哋故意講得簡單，有誤導之嫌。
雖然佢哋避得就避，但下星期法庭開審後，外界將進一步追擊公民黨，有排頭痕。
http://eastweek.com.hk/index.php?aid=14379
外傭勝訴影響唔大?莊豐源案夠話無影響:@
頁:
[1]