中環出更：曾鈺成「琦」 論 被指腦灌水
曾鈺成被陸頌雄（圖）炮轟「腦灌水」。（資料圖片）
本土民主前線梁天琦喺立法會新界東補選中獲六萬六千票成為焦點，立法會主席曾鈺成日前就大讚梁天琦喺競選過程中表現相當出色，助選團隊亦有好高質素，結果惹來建制派內部批評。工聯會元朗區議員陸頌雄於社交網站發文炮轟曾鈺成竟然大讚參與暴亂嘅人，仲希望係曾鈺成「洗頭時唔小心地腦子灌水」先一時失言。
區議員撰文炮轟
陸頌雄炮轟曾鈺成「有冇搞錯？你作為愛國陣營的icon（象徵），竟大讚梁天琦」。對於曾鈺成讚揚梁天琦表現出色，陸頌雄要求對方講清楚咩嘢出色，又質疑對方仲有無立場及是非黑白之分，言論相當惹火。陸頌雄接受查詢時話，社交網站所寫嘅內容只係有感而發，強調只係代表個人立場，同工聯會完全無關。
陸頌雄解釋，最初係收到街坊投訴，後來認為曾鈺成嘅講法會令好多支持建制派嘅人難以接受，所以喺社交網站上抒發個人感受。佢又話，如果係讚梁天琦口才好、靚仔就無意見，但就唔明梁天琦有何優秀，「係資源多？掟磚？定係網絡欺凌？」未知曾鈺成今次傷害咗幾多建制派人士嘅感情呢？
東方日報
頁:
[1]