內地廣電局出手 阻明星高價接戲
中國廣電總局公佈整治改革情況，講到明要遏制天價片酬同明星炫富問題，仲出手打壓電視劇及真人騷以「天價」搶明星接拍嘅現象，似乎想改變紅星片酬過高嘅問題，更有意推出「 限薪令」！
咁岩央視又播出演員天價片酬專題，仲提到單係《如懿傳》嘅霍建華同周迅，就已經收咗走1.5億元人民幣片酬，有知情者仲踢爆話佢哋實際拎咗2.5億人仔！而Angelababy嘅《孤芳不自賞》就袋走6000萬元人民幣；趙薇嘅《虎媽貓爸》亦收4000萬元人民幣！而部分當紅嘅小生花旦開價更加驚人，好似楊冪拍戲收1600萬元人仔，胡歌拍戲收1800萬元人仔，拍劇亦要300萬元人仔一集，貴得離譜！
不過成龍就曾經話過，明星有市場價值，演員片酬高但帶來嘅效益亦高：「一個願打一個願挨」，所以有片商為咗「票房保證」，不惜高薪搶人。不過有相關從業人員認為，內地演員片酬動輒高達製作費嘅七成甚至以上，會令戲劇品質下滑。
亦有內地導演指，南韓、美國嘅演員片酬約佔一部電影製作費嘅三成或以下，好似《太陽的後裔》嘅策劃總監就透露，男女主角嘅片酬只係制作費嘅兩至三成，因為佢哋達成共識，與其將大部分收益交畀演員，不如回饋電視台同製作單位，令影視圈可以繼續創造更好嘅拍攝環境！
新浪香港
頁:
[1]