政情：一味講錢 黨友DQ即呻窮 黃之鋒勸捐捱轟
香港眾志（眾志）羅冠聰、社民連梁國雄、劉小麗及姚松炎四人日前被高等法院裁定喪失立法會議員資格，裁決公布冇耐，眾志秘書長黃之鋒便立即喺Facebook（Fb）發文呻窮，大數眾志將面對嘅經濟問題，不過貼文一出隨即惹來網民批評，鬧爆黃之鋒第一時間講錢。正所謂無財不行，尤其係選舉，黃之鋒恨參選恨到出晒面，而佢到十月中就滿二十一歲，夠秤參選，依家咁急住抓銀，唔通係想為參加補選籌謀？
黃之鋒喺Fb話面對突如其來嘅官司裁決，除要糾纏喺繁複嘅上訴法律程序，亦對賠償訟費感到非常憂慮，而且有十幾個議員助理將失業， 政黨亦失去議員辦事處所提供嘅主要財政來源。佢更披露，失去每月二十萬元嘅辦事處營運開支後，眾志係咪可以喺八月維持基本運作亦成疑，強調目前所面對嘅困境前所未見。佢又繼續大打悲情牌，指眾志預料將步入寒冬，除咗財政陷入困境外，人手亦將嚴重短缺，呼籲網民以小額捐款月捐添！
網民質問捐咗嘅錢喺邊
有網民就留言對眾志感失望，因為第一時間只講錢，質問平日募捐嘅錢去向為何？更有網民直言黃之鋒經常周遊列國，單係去美國都已經「十次八次」，認為該黨已有唔少贊助，毋須再呼籲他人捐款。
急住抓銀 或趕參加補選
查實黃之鋒急住抓銀可能另有原因。佢早已有意參選去年嘅立法會選舉，但未夠秤，於是喺一五年十月就參選年齡申請司法覆核，冀能把參選年齡由二十一歲降至十八歲，但最終法庭以屬於政治問題拒絕受理。如今立法會出現六個議席空缺，預料最快今年底進行補選，而黃之鋒到咗今年十月十三日就年滿二十一歲，夠秤參選。
尤其係月初就佔旺清場被控刑事藐視法庭一案中，其代表大律師亦以黃之鋒有意參選立法會為由求輕判，暴露咗黃之鋒參選意向，而黨友羅冠聰日後亦極可能參加補選奪回議席，若兩人同時參加補選，眾志就要應付龐大開支，難怪黃之鋒會立即發文講錢喇！
然而，根據現行《立法會條例》及《區議會條例》規定，任何人被法院判監超過三個月，不論係咪獲准緩刑，喺判監後五年內均不得參選。所以黃之鋒最終能否參加補選，都要視乎佢單官司嘅裁決，再加上羅冠聰要分攤支付政府嘅訟費，兼且立法會薪津亦要「回水」，孭咗一身債隨時破產，黃之鋒依家勸捐得到嘅款項，分分鐘唔係用嚟選舉，而係畀訟費呀！
東方日報
頁:
[1]