政情：梁頌恆乾塘 被指內鬼唔開心
青年新政游蕙禎同梁頌恆因宣誓辱華風波，被法庭裁定取消立法會議員資格超過九個月，佢哋話一直都係靠積蓄過活，而梁頌恆接受電視台訪問時話佢依家就快「乾塘」嘞，仲話喺整件事嘅過程中，最不忿嘅係參政目的畀同路人質疑自己係「鬼」，反駁指如果有「鬼」，做到好似佢咁潦倒，令自己咁麻煩，相信呢個世界唔會有人再做「鬼」喎。積蓄就用晒 官司纏身揾工尷尬
梁頌恆喺電視訪問中話，依家嘅收入水平同以前相差好遠，積蓄亦已用得八八九九，想搵番份工，但尷尬嘅係，佢喺十二月有另一宗立法會內涉非法集結案件要上庭，審訊時間預計要三個星期，唔知有冇公司能夠接受員工上庭唔見咗三星期咁話。
佢又提到面對多場訴訟，喺法庭外亦經常被指罵，而更不忿嘅係參政目的畀同路人質疑，指如果有「鬼」做到佢咁潦倒，令自己咁麻煩，相信呢個世界唔會有人再做鬼。
呢排除咗出入法庭外，佢大部分時間都留喺屋企，間中賺吓外快。佢認為自己嘅政治壽命一定有限期，呢種心態令佢以往覺得每一個時間點只要仲係喺嗰個崗位，就要盡量把握每一個機會做最多嘅事，而喺戰線太長底下，亦係佢哋喺宣誓呢件事中進退失據嘅原因。
游蕙禎：仲未籌到足夠開庭按金
游蕙禎尋日喺另一個場合就話有關佢哋被取消議員資格嘅案件，終審法院喺本周五會處理佢哋嘅上訴許可申請，佢話至今未能決定係咪上訴至終院，或者要再多一個月先有結果。佢又話依家仲未籌到足夠嘅開庭按金，由於之前籌款停咗一段時間，加上近來太多政治事件發生，之後會好好處理佢哋嘅眾籌計劃。
老實講，立法會行政管理委員會稍後會開會討論「追數」，研究點樣向包括游梁同其他四個被取消議員資格嘅人士，追討薪酬同營運金額，依家梁頌恆講到就快乾塘，游蕙禎又話開庭按金都未夠數，若果行管會真係開展追數行動，佢哋冇錢還就可能要破產嘞！
東方日報
頁:
[1]