7個鐵路項目5個冇影 陸頌雄孖公眾狂插陳帆港鐵
陸頌雄打算喺論壇要陳帆同港鐵交代鐵路工程進度。
港鐵工程醜聞不斷，又超支又延誤。議員陸頌雄會趁著下星期6(7月4日)獲邀做線上論壇嘉賓嘅機會，連同公眾一齊狂質參與論壇嘅政府官員同港鐵代表。
線上論壇由香港鐵路運輸專業人員協會舉辦，主題係「香港鐵路工程，這麼近那麼遠」，起得好應景，事關鐵路工程一拖再拖。屆時運輸及房屋局局長陳帆同港鐵行政總裁金澤培亦都同台，陸頌雄打算到時問有關《鐵路發展策略2014》嘅進度，事關當時計劃起7個鐵路項目，但過咗6年只係得東涌西延線同屯門南延線已經交上立法會。陸頌雄大批其餘5個項目「冇影」，話做唔到嘢都應該同公眾解釋。
陸頌雄話原本打算喺立法會鐵路事宜小組委員會最後一次會議問政府，但佢話對方講法好隱晦，話「總之有啲嘢卡住」，所以佢決定一於喺論壇問清楚仲好，加埋市民一齊表達意見。
鐵路工程不斷超支延誤，佢話立法會見到工程超支就唔想批，結果再影響進度；跟住工程延誤要承擔加價成本，超支情況又更加嚴重，成件事就「無限loop」，佢打算喺論壇分享埋有關關注。
東網
頁:
[1]