泛民主派掀退黨潮 公民黨新同盟各有一人割席
西貢區議會網頁上，鍾錦麟嘅政治聯繫一欄已刪走「新民主同盟」。
鄭文杰話與身邊人商量後，決定退出公民黨。
泛民主派近來出現「割席潮」，公民黨、新民主同盟再有人退黨。黃大仙區議員鄭文杰宣布退黨，話係同身邊人商量一段時間，先做出呢個決定喎。而因參與去年民主派「35+」初選、47名被告之一嘅西貢區議會主席鍾錦麟，亦已正式退出新民主同盟。
加入新同盟超過10年嘅鍾錦麟，目前正被扣押喺赤柱監獄，已正式退出新民主同盟。喺西貢區議會網頁嘅區議員簡介中，佢所報稱嘅政治聯繫一欄，今日已刪走「新民主同盟」呢5個字。
而鄭文杰就喺社交網站發文，話同家人以及圈內、圈外嘅朋友思考良久，最終作出退出公民黨嘅決定。而日後會繼續專注地區事務發展，關注民生事務喎。佢又話為咗朋友、家人、以至香港，應承大家會好好生活，過好每一日咁話。
查實公民黨真係禍不單行，事關47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪。喺本月3日處理保釋申請時，代表被告譚文豪、郭家麒、楊岳橋同李予信嘅資深大律師、兼公民黨主席梁家傑，突然表示唔再代表4人，更加指4人已宣布退出公民黨。公民黨先後有黨員被取消參選同立法會議員資格(DQ)，而爆發退黨潮，早前已退黨嘅人士包括前議員陳淑莊、葵青區議員冼豪輝、譚家浚、南區區議員俞竣晞、東區區議員鄭達鴻等。
東網
頁:
[1]