何致宏因抑鬱症辭職 現與家人移居英國
何致宏發布喺倫敦塔橋嘅獨照。
區議員辭職潮早喺幾個月前已經爆發，當中不乏健康考慮。中西區前區議員何致宏於今年5月因抑鬱症辭職，當時未有詳述未來去向，今日(13日)就突然公布已經身處英國喇。
何致宏喺社交網站發布獨照，佢首先為自己辭任區議員再次向街坊致歉。之後提及自己喺過去受到持續恐嚇，每日都活喺巨大壓力之中。幸好現時已經身處海外，佢同家人嘅情況已經較為安全，持續服藥亦令病情有所改善。何又話自己永遠都係香港人，亦因作為香港人為榮，佢會繼續喺英國同各位香港人一齊努力，希望有一日可以喺香港團聚喎。
話說何致宏喺5月份公布辭任決定，佢當時提到喺現今環境下進行政治工作需要承受極大嘅壓力，而軟弱嘅佢因而患上情緒病，需要暫時離場啊。
東網
頁:
[1]