丁仕元「失蹤」半年 證移居英國幫街坊鋪木地板
政府上年要求全港區議員宣誓效忠特區政府及擁護《基本法》，引起區議員辭職潮，更有唔少區議員已離開香港。其中，沙田前區議員丁仕元上年辭職後亦有消息指佢已經移居英國。去到今個月20日，竟然見到佢出現喺已經離港赴英嘅沙田前區議員丘文俊Facebook上，仲化身裝修師傅鋪地板添！
丘文俊日前喺Facebook貼文，以「英倫區政裝修」為題，話地下全層鋪地板嘅工程已經完工，原來佢哋係幫同樣移居英國嘅一名沙田街坊鋪設家居地板。丘嘅貼文入面包括咗一張丁開工時嘅相片，見到丁蹲喺地下，用錘仔整緊地板。丘又形容丁係今次工程嘅總師傅同埋召集人，又叫大家若果有關英國裝修方面嘅諮詢，可以同佢哋聯絡喎。
丁仕元喺上年5月稱因不能再以從政施展自己抱負，亦唔想令家人活於惶恐而決定辭職，辦事處同社交專頁都已經停用。上年7月時有消息指佢已舉家移居英國，而佢亦都半年時間無喺社交平台更新情況。
東網
頁:
[1]