大S被汪小菲爆服違禁藥 S媽喊住求前女婿留口德：講得太...
台灣女星徐熙媛（大S）前夫汪小菲早前被爆婚內已背大S出軌張穎穎，仲有台灣資深記者公開展示聲稱係汪小菲同張穎穎嘅婚內出軌照片作「鐵證」，相中睇男女衣衫不整兼有肢體動作！到咗今日（30日）汪小菲於社交網發文反擊，指自己並冇婚內出軌，佢留言：「與我商談離婚為去年2月份的事情，此後我多次往返兩岸處理婚姻和生意問題。隔離5次。期間因情緒問題的確出現過酒後失態，照片也為朋友所拍，在此向大家道歉。至於該記者所說的出軌多位女子更是子虛烏有的事情，我已經委託律師團隊在台灣提起訴訟。」
而汪小菲又再發文還原離婚時間軸，佢話大S自從去年2月就多次提出離婚，但係佢依然盡力嘗試挽回婚姻，仲指控大S長期違法服用違禁藥物：「我，本人汪小菲，不想再讓任何人勒索了，我會在兩岸同時採取法律手段維護合法權益。事件如下。2020年7月我自己隔離回大陸，二月回到台灣隔離就收到徐熙媛要離婚的要求，我極力挽回以為已經談好了，所以再次回到北京進行隔離。5、6月時，因為疫苗和孩子安全的原因，我無法將孩子帶回北京，本人情緒激動，發了怒對台灣抗疫的微博，第二天就又收到對方離婚的通知。在此期間，本人被多次被通知回去辦離婚，也多次挽留，這期間我盡力安排他們回大陸隔離，好好生活陪我創業，均被拒絕！我實在無法忍受於10月底再次回台灣談離婚！結婚期間，徐熙媛長期通過他人處方服用違禁藥物，每月還要我給藥方100萬新台幣（約27萬港元），她幾次精神出現狀況都是本人在旁搶救，不多說了。」
及後，大S經理人對此作出回應，指大S從來都唔會做違法嘅事，佢亦從來都唔會強迫任何人做任何嘅嘢，仲話大S自從喺第3胎流產後，身體就一直好虛弱，仲要堅持自己照顧2個孩子，所以佢盡量將時間留畀孩子。至於汪小菲所指嘅100萬新台幣「藥費」，其實係畀大S嘅家用，呢筆錢係汪小菲自己願意負擔嘅，離婚後之後都係一樣，冇畀多過錢。
大S媽媽哭訴
大S媽媽（黃春梅）對此事回應時，明顯被汪小菲嘅言論激親，佢喊住話：「我們是正常的家庭，哪來的違禁品？熙媛自從生兒子之後，癲癇復發，她長期吃抗癲癇的藥，也因為壓力太大，她有吃醫生開抗壓力的鬆弛劑，這2種藥都是醫生開的藥，不是違禁品。」對於汪小菲所指每月畀100萬新台幣（約27萬港元），大S媽媽表示呢啲錢係包括埋小朋友嘅生活費、教育費 ，唔單止係畀大S嘅，並指大S因長期服用抗癲癇藥，近年都冇幕前工作，仲話大S依家個身體情況已唔適合再出來工作。
對於之前疼錫嘅前女婿突然「爆料」，大S媽媽喊住求對方留口德：「我之前那麼袒護他，他這次講得太過分了，請他留一點口德，為了兩個孩子，不要再傷害熙媛。」仲透露大S知道前夫誹謗佢，感到非常難過、傷心，大S媽媽表示唔希望事件到最後要鬧上法庭，而佢都相信汪小菲係受咗刺激先咁講嘢嘅。
東網
頁:
[1]