標題: 母撐追夢 尖子棄高薪揸巴士 [打印本頁]
26歲尖子梁領彥兒時夢想當巴士司機，上月初放棄高薪厚職，做九巴司機圓夢，月薪約1.5萬元，現時駕駛296M線。（劉焌陶攝）
中環工「做多十幾年放棄更多」
【明報專訊】兒時看似天馬行空的夢想，往往在長大後被遺忘或放棄。26歲已晉身四大會計師行部門經理、月掙數萬元的梁領彥（Gary），昔日是會考9A1B的尖子，今天在母親鼓勵下，辭職轉做巴士司機，人工減三分之二，無非要給自己放一個悠長「工作假期」，圓兒時夢。別人笑他太瘋癲，他反駁﹕「現在我只放棄數萬元人工，再做多十幾年，要放棄的更多！我幸運有條件，有夢就要追，免得後悔！」
而梁媽媽的一句「你咁辛苦，唔好做啦，你去揸巴士啦！」，更予他極大支持。
自小愛巴士 當放「工作假期」
「巴士！巴士！」梁領彥自小對巴士情有獨鍾，每次見到巴士總興奮莫名，兩歲已清楚記得巴士上的廣告。巴士每開新路線，他會試坐，看着車長肩負載客責任，他亦渴望當車長，「以前同嫲嫲喺白田邨住，最鍾意去站頭同巴士司機傾偈」。
9A1B生 4年升大行經理
Gary是獨子，父為退休公務員，母親現當文職，生活無憂。他2003年會考取得9A1B，拔尖入讀中大計量金融系，畢業後在四大會計師行任企業財務分析員，打滾4年躍升經理，月薪數萬元，每日在冷氣房協助各大公司收購。雖然他平步青雲做「筍工」，但「揸巴士夢」從未磨滅，只靜待時機。
「我已經近兩星期無見過屋企人，好想停一停」，Gary肩負要職，經常早出晚歸，至去年底的冬至亦無法回家吃飯。
那一晚他拖着疲累身軀回家，已萌生辭工念頭，豈料打開家門，母親竟恍如有讀心術般笑着迎接，「好耐無見你喇！阿仔你咁辛苦，唔好做啦，你去揸巴士啦！」
母「預知」累壞﹕你去揸巴士啦
母親的話似是戲言，原來是默許，Gary鼓起勇氣放棄厚職，放一個「工作假期」，應徵做月入約1.5萬元的巴士司機。
同事親友笑他太瘋癲，勸他趁後生博上位，「公司咁睇你，做多十幾年先做車長啦」、「讀咁多書去揸車，你傻咩？辭咗職仲搵得番份工？」Gary卻毫不猶豫，「呢一刻我只是放棄數萬元人工，無家庭負擔、唔需要供樓，再做多十幾年，要放棄的更多！」
他今年初應徵時表明學歷，擔心九巴以為他「玩玩吓」，幸誠意補足，4月初終於獲聘，29日正式工作。當日他穿起熨得筆直的制服，坐上夢寐以求的司機位，駕駛來往坑口港鐵站及康盛花園的296M，回想當時情境，他仍覺「好興奮」，「我終於實現夢想！每日期待見到不同乘客！」
長者客多 直接助人感滿足
Gary每朝6時開工，這路線特別多長者，他每日要「落手落腳」推輪椅，訪問當日，一個老伯伯持拐杖上車，他一直望着倒後鏡，確保伯伯坐穩才開車。工作忙碌，人工大減是否值得？「呢份工可以直接幫到公公婆婆和社會，滿足感很大。」
追夢有時很奢侈，Gary笑言他獲家人支持是幸運兒，「若無錢開飯很難追夢，但如果有條件，應該放膽去試，實現夢想嘅快樂用錢買唔到！」此時此刻，乘客一句「多謝司機」，他已感滿足。Gary未計劃「工作假期」放多久，但他日仍希望重返專業範疇工作，或在巴士行業從事相關專業工作。
現有近8000名車長的九巴表示，計劃今年內增聘約千名車長，申請者須持有第一類別駕駛執照3年或以上，及駕駛紀錄良好，並要通過面試、駕駛測試和體檢，學歷水平不限。
http://news.sina.com.hk/news/20130520/-3-2972938/1.html
「阿仔開心 做一世司機無所謂」
【明報專訊】「非常兒子」背後有一對「非常父母」。Gary梁領彥放棄厚職「揸巴士」，被親友罵他「傻」，爸媽卻不以為然，力撐他追夢追到底，兒子上班第二三天，他們更踏上巴士做阿仔乘客，梁太笑言﹕「我好開心個仔做到自己想做嘅事，就算佢要一世做巴士司機都無所謂！」
梁太說去年底冬至晚上提議兒子辭職轉行做巴士司機，最初「不是很認真」，但算是默許，「個仔細個就鍾意巴士，好想做巴士司機，上年考埋巴士牌，我知道佢有一日會去揸巴士」。
不怕家用少 只怕交通意外
兒子轉行做司機，薪金減三分之二，家用減少逾半，親友看不過眼叫Gary「唔好辭職」，梁太則叫他放心去做，擴闊眼界，「人工少咗無所謂啦，我哋唔係要好富貴，佢家日日都好開心，每日都同我講佢遇到乜嘢乘客」。
看見兒子愈活愈快樂，梁太笑言「條路佢自己揀，佢要一世做巴士司機都無所謂！」但她仍未放下心頭石，擔心獨子遇上交通意外，「提住佢小心啲、揸慢啲，最緊要睇住老人家，唔好整親佢哋」。
自小有商量 興趣升中自己揀
兩母子能如此親密，原來從小到大，無論讀書或上課外活動班，一家都有商有量，「試過叫佢畫畫，佢唔鍾意就無畫，只學佢喜歡嘅唱歌同彈琴」。
小學升中時，人人建議Gary選傳統名校，但他最後選了地區名校，我行我素的性格，早已三歲定八十。
http://news.sina.com.hk/news/20130520/-3-2972937/1.html
學歷好無助學車 嘆車長地位被低估
【明報專訊】九巴司機平均47歲，梁領彥（Gary）這個26歲的小伙子在中環打滾4年，每日穿著西裝恤衫上班，與不少精英共事，他轉行做巴士司機，學歷比其他司機大佬高，卻無半點傲氣，「我只係讀書較好，我相信我嘅舊同事都未必學得識揸巴士」，又反問「巴士司機都有貢獻，點解對佢哋待遇唔同？」
「車長都有貢獻 點解待遇唔同？」
梁領彥4月初開始接受九巴訓練，「同班同學」大多較自己年長，很多當過司機，做過文職的屬少數，為免尷尬，他亦避談身分。
有一次他與其他朋友WhatsApp，被同事發現他用英語對答，十分驚訝，「嘩點解你咁高檔嘅？」在西貢操車遇上外國人問路，他英語對答如流，一起學駕車的同學亦嘖嘖稱奇，最終因公司學員名單印上其舊職銜，終令「經理」身分曝光。
英語流利「同學」驚訝 經理身分曝光
Gary沒有因此覺得高人一等，反而感到尷尬，「我只係讀書較好，唔代表我樣樣叻」，他稱不少同學學車「很快上手」，相信中環上班的舊同事亦未必學得懂。在他眼中，巴士司機同樣付出努力貢獻社會，理應一視同仁，「巴士司機都是一門專業，人人都可靠努力養家，點解社會對中環上班一族同司機嘅待遇唔同？」
與司機大佬交談，談吐雖然較粗俗，勝在簡單直接，「佢哋講嘢係大聲啲，但唔代表惡，知我係新人，就算我唔識都會過嚟幫手！」小伙子闖進「大人世界」，未知前路如何，卻早已引來一班粉絲，特意乘搭他的「專車」。
http://news.sina.com.hk/news/20130520/-3-2972936/1.html
有學歷,有前線經驗.好快會升為管理層.