標題: 國泰全球第六 空姐No.1 [打印本頁]
【明報專訊】航空網站「Skytrax」每年都會搞航空公司選舉，2013年「全球最佳航空公司」嘅美譽，由阿聯酋航空（Emirates）獲得；去年排首位嘅卡塔爾航空就得第二名，第三名係新加坡航空。香港嘅國泰航空今年雖然下跌兩位，只得第六名，但就仍獲「全球最佳機艙服務員」同「最佳泛太平洋航空公司」兩項大獎，都算成績唔錯。
阿聯酋上次登榜首已經係2002年嘅事，阿聯酋CEO Tim Clark話，佢哋係因為非常努力，先可以滿足到客人嘅要求。國泰行政總裁史樂山（John Slosar）接受CNN訪問時話，國泰教機艙服務員唔好只係死跟規則，要喺工作中表現自己，用心服務乘客，先至可以得獎。
另一間香港公司港龍就獲推選為「全球最佳區域航空公司」同「亞洲最佳區域航空公司」。「最佳廉價航空公司」就由亞洲航空奪得。Skytrax呢個獎項由全球160幾個國家或地區嘅1820幾萬個乘客選出，評核標準包括整潔度、機上食物同機艙環境等。
http://news.sina.com.hk/news/20130620/-3-2997481/1.html
空姐第一?服務態度?