標題: 50萬粒lego砌出世遺 [打印本頁]

---

香港參展者許肇智建造嘅「天壇」樂高模型體積約4呎乘4呎乘3呎，用咗10萬塊樂高，花咗90日製造，係全場最大、用樂高粒最多、建造時間最長嘅展品。（林俊源攝）

上月納入世界遺產嘅日本富士山樂高模型展出。展覽創辦人梶原毅話，建造前要齊集各個角度照片，以令模型多角度像真。（林俊源攝）

【明報專訊】樂高係唔少人嘅成長玩伴，有商場今日起展出由50萬塊樂高砌成嘅40座世界遺產模型，包括羅馬鬥獸場、法老王像、泰姬陵等。當中嘅四川大熊貓、北京天壇、莫高窟、福建土樓4件模型仲係由港人砌成，好嘢！


港人砌天壇 全場最大

展場內最大、用最多樂高粒、最長時間整成嘅展品，係由香港IT男許肇智（Alex）設計嘅天壇模型，差唔多有半個人咁高，用咗3個月以10萬粒樂高砌成。Alex話砌天壇最有挑戰性嘅，係要將起角方形嘅樂高砌成天壇嗰3個圓錐形瓦面，佢最後用樂高薄方塊加圓粒，再用積木間嘅虛位先處理到呢個難題。佢仲好興奮咁同Emily講，多得樂高公司近年出咗唔同顏色嘅積木，先可以砌到顏色較沉實嘅中國建築。


太古城展出至31號

Alex話佢每周都花十幾個鐘砌樂高，犧牲咗唔少拍拖同陪屋企人嘅時間。佢呢幾年索性教埋女友砌樂高，將興趣融入拍拖生活，預備展覽嗰排，仲會用大部分拍拖時間一齊砌出作品！


「Piece of Peace世界遺產樂高展」喺太古城中心舉行，係香港首個最大型世界遺產樂高展，展期即日到本月31號。

明報