標題: 重新拍賣頻譜阻打112？ [打印本頁]
香港4個3G牌照2016年到期，政府想收番四大電訊商持有嘅部分頻譜重新拍賣，惹嚟電訊商不滿。數碼通執行董事陳啟龍（Patrick）噚日話，按政府想法，將三分之一嘅3G頻譜抽起拍賣，新拍到嘅電訊商，至少要有一兩年時間準備，其間整個服務市民嘅頻譜就只剩番三分之二。Patrick話到時唔止上網會慢咗，連語音服務都會受影響，情况好似家有時繁忙時間，喺金鐘港鐵站你都未必打到電話咁，佢仲話最差情况係連112呢啲緊急電話都未必打到。
莫乃光：影響程度要問專家
佢話，緊急電話嘅原理係，你幫襯嘅電訊商信號未能覆蓋某啲位，但用家遇事要報警打112，其實係「勾」另一個電訊商嘅網絡，但若頻譜不足，4個現有電訊商網絡都好繁忙，咁真係有可能未必打到112。Emily問過立法會資訊科技界議員莫乃光，佢話Patrick嘅講法邏輯上正確，但佢都要請教專家了解個影響有幾大先。
明報