標題: 社民連成員向葉劉挑機 [打印本頁]
隱藏身分去新民黨實習
【明報專訊】唔少大專院校都要求學生做實習，本身係社民連成員嘅城大副學士學生肥蔡，早前就選擇去新民黨，諗住睇吓建制派點運作。一直隱藏身分嘅佢，噚日就趁新民黨主席葉劉淑儀請一眾實習生食飯，挑戰葉太，最終搞到葉太黑面。
肥蔡話，為咗今次挑機做足功課，事前搵晒葉太嘅投票立場、文章，噚日喺飯局，一開波問葉太有幾耐無去過深水埗，葉太答佢好耐無去，佢就質問「知唔知啲人幾窮、有無去過劏房」，質疑對方點解支持保留粉嶺高球場，又問佢每月白交3000幾蚊會費畀球會，「知唔知窮人要執幾耐紙皮先有？」
著社民連衫同田二少合照
葉太聽到呢度扯火，肥蔡話葉太黑住面咁答佢，「啲錢係我嘅，你理得我點用？」又話肥蔡受民主派洗腦，無了解事實等。畀人挑機，葉太最後以趕時間為由，無同一眾實習生合照就走人，但肥蔡就著住件社民連衫同副主席田北辰合照，佢話當佢除面衫露出社民連戰衣時，田二少無反感，仲講笑話「賣廣告要畀錢喎」，佢坦言呢件事令佢對田二少有少少改觀。
有新民黨中人透露，葉太被挑機後未下火，開內部會時重提個學生亂講、被民主派洗腦，但就無提出對方係社民連一事，似乎唔知「被滲透」。
http://news.sina.com.hk/news/20130719/-3-3020584/1.html
新民黨無防範?