標題: 經民聯海景宴款待 [打印本頁]
請雅安災區學生訪港
【明報專訊】四川雅安4月中發生強烈地震，經民聯就安排100個當地學生嚟香港玩幾日，噚日搞咗個歡迎晚宴，其中前環境局政治助理蔡少綿（Linda）都係座上客，原因係佢已經返新工，喺迪士尼樂園做政府事務副總裁，佢話基本上乜嘢都要做，又話返咗工3個星期，今次出席係因為迪士尼都會招待四川學生去樂園玩番日。
前政助蔡少綿：堆填區要擴建
對於今屆政府下，環境局火頭多多，堆填區擴建仲未成功，而佢嘅下手、環境局政助區詠芷又因喺網上話傳媒偏頗而惹爭議，Linda都只係笑笑口，話自己不在其位不謀其政，所以唔評論，但就話堆填區係應該要擴建嘅。離開政府咁耐，噚日Linda見到政制及內地事務局長譚志源，亦有同對方噓寒問暖一番。
經民聯招待四川學生，佢哋都好重視，監事會主席林建岳、立法會議員林健鋒、梁君彥、石禮謙等都有出席，而上任無耐嘅中聯辦副主任楊健就擔任嘉賓。
明報