標題: 憶中英秘談 任志剛盼保粉嶺別墅 [打印本頁]
港澳辦前副主任陳佐洱早前出書提到，特首粉嶺別墅曾是中英雙方舉行會談嘅秘密地點。原來金管局前主席任志剛，早喺陳佐洱到訪別墅3年前已有類似經歷，任總喺1988年已經以英方副金融司身分，喺粉嶺別墅同「中英金融事務小組」當時嘅中方成員、包括港澳辦前主任魯平會面，仲話當日議題包括成立金管局添。
當年負責接中方成員
任志剛噚日喺《信報》撰文，話當年佢有特別任務，就係去文錦渡接中方成員去別墅，當時中方成員有中國銀行前副行長李裕民、人大財政經濟委員會顧問勇龍桂等。當年佢哋開會只係喺日誌寫咗「粉嶺」兩個字，仲要搭直升機由文錦渡去別墅。
會議曾提成立金管局
至於英方成員，英方政治顧問辦公室都有人嚟，令港方小組更有「英國味道」。任志剛話會議提到成立金管局嘅事，佢形容當時兩方面都表現得有啲「模稜兩可」，令佢有啲失望。但無緊要，金管局喺4年幾後成立，任志剛之後成為總裁，至2009年離任。
任志剛話別墅有歷史價值，呼籲社會高抬貴手，放過粉嶺別墅！不過，有網民就評論，問點解政府又唔放過古洞村民喎。
明報