標題: 財爺訪漁場 話蒸魚至愛 [打印本頁]
【明報專訊】梁振英（CY）噚日落天水圍，場內場外風風雨雨，睇番財爺曾俊華則發表網誌，話自己早前去咗東莞參觀一間港資漁場，嗰度養咗一批澳洲寶石魚，除咗入口香港，仲成功打入內地13億人市場。因為水質管理夠好，漁場攞到中華廠商會刺身級認證，所以財爺有得即席試食寶石魚刺身，佢將刺身點咗些少豉油加青芥，話口感同油甘魚或魚刺身幾相似，但自己都係鍾意清蒸魚多啲喎。
除咗有得食魚生，財爺仲仔細參觀咗呢個港資漁場，佢大讚漁場環境反傳統，喺現代化大樓入面設有多個水池，分階段咁養殖寶石魚，咁就可以確保佢哋唔會同一時間成熟，可以一批接一批推出市場，唔止提升產量，仲有利穩定售價！財爺話，漁場東主本身喺香港做成衣生意嘅，近年先開始涉足漁業，係港商靈活成功轉型例子，值得本地商人動吓腦筋、跟佢學吓嘢咁話。
明報