標題: 大家樂推公平貿易果茶 [打印本頁]

---

大家樂集團總監熊子弦（左）話，上周二起喺10間分店提供來自斯里蘭卡嘅公平貿易果茶。右為香港公平貿易聯盟創會主席梁佩鳳（圖片來源：明報）

上周二起大家樂10間分店推出斯里蘭卡有機果茶，係用公平貿易價錢向當地約6000個農民入貨，令佢哋每公斤茶葉收入由平均17至20盧比（約0.9至1.2港元）增至29至31盧比（約1.7至1.8港元），希望可以改善茶農生活。果茶售價同其他餐飲一樣10蚊杯，跟餐可免費轉飲。


農民每公斤茶葉多掙幾毫

香港公平貿易聯盟創會主席梁佩鳳同Emily講，斯里蘭卡人每日收入只得8美金（約62港元），公平貿易可以令佢哋得到合理回報改善生活，部分錢會撥去做基建、教育同保育。現時香港有約100個公平貿易銷售店，希望未來有更多市民理解背後概念。

大家樂集團總監熊子弦話，公司繼旗下意粉屋賣公平貿易餐酒後再引入果茶，係希望令市民明白，公平貿易同有機產品唔一定好貴，佢哋今次會喺中環、金鐘、銅鑼灣同尖沙嘴等10間大家樂分店，推出雜果、芒果橙兩種口味果茶做試點，睇吓反應再決定。

明報