【明報專訊】臨近國慶，好多本港團體都舉行酒會慶祝，噚日Emily去咗香港廣東社團總會嘅國慶酒會，佢哋慶祝嘅時候都不忘「反佔中」，呼籲作為沉默大多數嘅「500幾萬廣東籍鄉親」要為港出聲，強調港人要嘅係和平嘅民主政治同依法選舉。
香港廣東社團總會主席兼全國政協委員王國強喺酒會致辭時話，廣東社團總會堅決反對佔中，仲話用佔中等激進手段嚟推動普選特首，只會令社會陷入無序同混亂之中，仲會危害香港嘅安寧同大大損害香港經商環境，所以呼籲沉默嘅廣東籍鄉親為港出聲。
另一方面，「幫港出聲」召集人周融噚日出席新聞界慶祝國慶酒會時，同Emily講幫港出聲一班教授團喺不久嘅將來，會就特首普選方法為香港人提供意見，不過佢強調幫港出聲唔會有方案提出，佢覺得教授團嘅成員眼光比政黨闊，唔會只係去睇點拎着數。周融強調個人係支持不同政見嘅人，包括泛民代表，出選2017年特首選舉。