【明報專訊】民主黨噚晚19周年黨慶，政務司長林鄭月娥、財政司長曾俊華畀面到賀，政壇歌王、平機會主席周一嶽（York）當然有開腔唱歌，但就唔係佢嘅飲歌《忘不了你》，而係同人合唱《月亮代表我的心》，搞到民主黨主席卿姐忍唔住上台獻花，仲引埋年年爭裝頭炷香嘅藝人黃夏蕙上台獻玫瑰，但York就好抵死咁回咗一句「有刺嘅」！
噚晚好多民主黨黨員幫手落力籌款，何俊仁扮近排好hit嘅「美×髮彩」，話「立即抹黑亦得」，諷刺近排民主黨成日被人抹黑話係「外國勢力」。卿姐親手整咗8樽醉雞，每樽5000元，連夏蕙姨都買番樽，岑建勳更一次過買4樽。
數到出手最闊綽，就要數疑似特首黑馬、前財經事務及庫務局長馬時亨，佢先用8萬元投咗前政務司長唐英年嘅一箱酒，後來又用30萬元買咗國寶級畫家黃永玉作品《花鳥》；後來仲愈買愈興奮，對唐唐以10萬元底價捐出一支DRC Romanee Conti紅酒都想入手，不過最後由恒地執董黃浩明以22萬元投得。
佔中三子戴耀廷、陳健民、朱耀明就大展歌喉，陳健民送咗一幅讓愛與和平佔領香江嘅書法畀民主黨。最後民主黨初步計算籌到235萬元，真係可喜可賀。