標題: 民建聯黨團遲到要罰錢 [打印本頁]

須預繳1000蚊

【明報專訊】政黨都需要紀律，不過唔係所有黨員都咁聽話，開會隨時有人遲到早退，做開民主黨黨鞭嘅劉慧卿就嚴格執行開會遲到罰錢制度。而繼民主黨後，第一大黨民建聯喺黨團亦實施遲到罰錢制度，噚日生效，首次實行已有兩個黨友遲到，據聞分別係陳克勤同陳恒鑌。

陳克勤陳恒鑌「先拔頭籌」

民建聯黨團召集人葉國謙話，佢哋一星期開兩次黨團，包括星期三立法會大會前同埋周五內會前，其中周三會議9點45分召開，呢個時間都幾早，或者對部分議員嚟講係挑戰。至於遲到罰幾錢，阿謙拒絕透露，但就話無緩衝時間，即使遲1分鐘都要罰錢。

據聞陳克勤噚日開會遲咗幾分鐘，事前有通知黨友話塞車會遲，但都不能倖免要罰，至於陳恒鑌就遲到約15分鐘。

唔知係咪驚有人唔認數唔肯罰錢，民建聯呢個罰錢制，每個議員仲需要「預繳」，據講每人先要交低1000蚊，有人遲到就扣數，但究竟到會期尾，準時者有無得回贈就不得而知喇。

明報