「有收視雞汁何妨？」 -

【明報專訊】無綫飲食節目《May姐有請》，主持馮美基（May姐）因為幾乎集集落「雞汁」煮餸，惹來網民批評，近日免費電視牌照風波鬧大，May姐頓成被狙擊對象。自言帶May姐入行、做過無綫管理層嘅自由黨主席周梁淑怡，噚日就為May姐抱不平，周太話，覺得網民咁做對May姐都「唔係幾fair（公平）」，因為呢個係自由市場，有人睇先有人做。

雖然May姐近日讚賞香港電視創辦人王維基好積極，又話希望政府交代發牌原因，不過網民一於少理，繼續瘋傳May姐笑聲。周太噚日就反問呢啲人，話「如果收視一直keep（保持）住有20幾點，點解仲要介意嗰啲雞汁？」周太否認May姐有同佢呻過，但問佢覺唔覺得May姐畀人擺上枱，周太都話覺得有少少。另一個飲食節目《吾淑吾食》好快會接替May姐個節目，由黃淑儀主持，日後要聽May姐笑聲，恐怕要見到真人或者上網重溫喇。