標題: 政情：工聯小花挑戰阿人冇壓力 [打印本頁]
十一月區議會選情認真波譎雲詭，唔少大佬級人物都打算出戰，好似職工盟秘書長李卓人（阿人），從政幾十年，今年打算處男下海，出戰區議會選舉，仲極有可能同工聯會「小花」劉桂容打對台添！雖然對手強勁，但廿七歲嘅阿容就笑言冇有怕，話會以平常心面對，仲話自己係新人冇乜壓力喎。
阿容喺天水圍富恩區服務已經超過五年，佢坦言當年中五畢業後因為家庭關係，已投身社會工作，幸好僱主畀機會佢進修，今時今日已經有大專學歷喇。本身係新移民嘅阿容，九七年來港後，經歷咗好多困難，最後都成功克服，依家仲可以反過來服務其他居民添。
雖然阿容平時表現怕醜，但熱愛攝影，讀中學時就曾經同一班同學影低天水圍嘅一事一物，透過照片令外界更了解該區可愛之處，而近年更不時為工聯會活動擔任攝影師。原來阿容嘅男朋友就係工聯會荃灣區議員葛兆源，兩人志趣相投，熱愛地區工作，唔知佢兩個能否喺區選中雙雙勝出呢？
劉桂容有機會同李卓人對決，佢笑稱冇壓力，以平常心面對。 （許紹基攝）
http://orientaldaily.on.cc/cnt/news/20110902/00176_084.html
李桌人怕死?
