標題: 政情：民記瘦雞餐 誘區「老」退休 [打印本頁]
早年經濟唔好，政府有意縮減公務員編制，卒之諗咗「肥雞餐」呢條橋，以優厚條件利誘公務員提早退休，但估唔到肥雞餐呢樣玩意，竟然連政黨都跟風。民建聯（民記）決定推出「政界肥雞餐」，如果有年過六十歲嘅區議員願意退位讓賢，兼成功捧到新人勝出下屆區議會選舉，就可轉任民記地區顧問，每月獲一萬元資助。不過，區區一萬元資助就被黨員譏諷為「瘦雞餐」。
傳針對東區及屯門區
現時民記擁有全港最多嘅區議會議席，但唔少都係資深區議員。佢哋有番咁上下實力，所以連任四年又四年，令到黨內第二、三梯隊變晒中年人士都未上到位。民記近年銳意搞年輕化，惟有推出銀彈策略吸引資深區議員提早退休，避免黨內出現青黃不接局面。
所謂銀彈策略，總之逢係年過六十歲嘅現屆區議員，如果肯自願退位，並成功培育出一名接班人，再加上贏得年底區議會選舉，就可以喺未來四年以月薪一萬元獲民記聘請做地區顧問，變相有份糧養住，又可以協助第二梯隊接棒，絕對係一舉兩得。民記推出呢個計劃，有傳係針對東區同屯門兩區嘅區議員，等佢哋醒目自動退休，唔好再霸住個位。
未合胃口 恐鬧翻收場
不過，世事永遠無咁完美，呢個計劃到底有幾多人參加，仍然係一個謎。甚至有現任資深區議員講笑話，呢個唔係肥雞餐，而係「瘦雞餐」。因為現時區議員薪酬差唔多加到三萬元一個月，再加上可以申報幾萬元辦事處開支，養住一大班助理同社區主任，都算係一份唔錯「職業」，但假如退位後，就只係得番一萬元。
坦白講，民記出得嗰區區一萬元津貼，以現時區議員嘅胃口，實在唔多吸引。不過，作為咁大嘅政黨，「軍令」如山，若要黨員退位，豈可不退？依家民記提出得咁嘅建議，都係婉轉示意班資深區議員退位讓賢，而一萬元亦只係象徵式補貼，如果資深區議員唔識知所進退，雙方最終可能鬧翻收場，該批區議員分分鐘要退黨競逐連任都未定。
東方日報