標題: 政情：黃之鋒被批籌旗「食水深」 [打印本頁]
由前學民思潮成員黃之鋒、黎汶洛和前學聯秘書長羅冠聰等人成立的「香港眾志」周日舉行成立典禮，同時宣布考慮出選九月立法會選舉，所以成立之後第一時間就進行網上眾籌經費，但就被網民質疑「食水深」。點知黃之鋒就留言暗寸本土民主前線（本民前）及青年新政私下有金主，估唔到選舉未開始就已經開打網上輿論戰。
黃之鋒尋日在網上解釋要在短時間內籌募二百萬元嘅原因，指創黨一筆過開支達十三萬元，而每月嘅恒常開支達十七萬元，至九月參選前要預備六個月嘅恒常開支，另外需要八十五萬元選舉開支，所以一開始就要以眾籌解決燃眉之急。
暗寸本民前青政有金主
不過，黃之鋒的解釋似乎未能釋除網民疑慮，有網民更將香港眾志與早前參與立法會新界東補選嘅本民前梁天琦及參選區議會嘅青年新政比較，指其他組織都沒有眾籌，叫黃之鋒「問下（吓）人地（哋）點做到啦」。黃之鋒隨即留言回應，「我地（哋）唔想私下搵金主」，言下之意，唔通佢知道本民前和青年新政私下有金主？
東方日報