標題: 中環出更：傘兵組聯盟謀區會搶位 [打印本頁]
喺一四年佔領行動過後，有唔少「傘兵」籌組地區組織。沙田社區網絡、藍田社區網絡、屯門社區網絡、荃灣社區網絡、天水圍社區網絡同葵青連結動力等六個組織，尋日宣布成立「社區網絡聯盟」，表明會積極考慮參與一九年區議會選舉。至於政治立場方面，聯盟公共關係、藍田社區網絡社區主任李晉希就話唔會定性組織走乜嘢路線，交畀選民決定喎。
未同泛民撞區 望奪15席
聯盟發言人、沙田社區網絡主席劉頴匡話聯盟現時有八至十個地區工作者，目標係一九年區議會選舉中同其他友好組織聯合共奪取十五席。佢話暫時未出現同泛民「撞區」嘅情況，希望未來唔會有不必要嘅衝突，雙方能夠互相尊重。
劉頴匡透露，六個組織現時合共有二十至三十名成員，有部分人更係全職投入地區工作。至於資金來源，佢話聯盟會以籌款同捐助嚟維持運作，而喺聯盟當中，有部分組織已獲社團註冊、公司註冊，其餘則在申請當中，聯盟現正申請有限公司，但申請至今約一個月仍未有消息。佔領中環發起人、港大法律系副教授戴耀廷亦有出席成立典禮，佢話支持聯盟嘅地區工作，認為佢哋落區參選對民主運動好重要。
東方日報