標題: 參與35+初選涉違國安法　張可森還押中結束議辦 [打印本頁]

---

47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪，其中一名被告屯門區議員張可森被撤保釋仍然還押候訊。屯門區議會副主席黃丹晴尋日(27日)係Facebook宣布，張可森嘅議員辦事處同日結束營業，稱各位街坊如果有地區事務查詢可以聯絡屯門聯網其他區議員。要還押嘅區議員唔止張可森一人，究竟點解佢個議辦要結束呢？

屯門區議員潘智鍵回應查詢時指，結束辦事處係張可森一眾議員助理嘅安排，估計係喺探訪完張可森之後嘅結論，其他同一組織嘅屯門區議員都配合返相關安排。佢又話，張可森嘅助理曾經向民政事務處查詢，仲可唔可以繼續報銷辦事處租金費用，但係就冇得到明確答覆，所以決定先關閉辦事處，以免日後報銷唔到費用。

張可森早前已經刪除Facebook專頁，區議會事務方面，佢亦退出多個委員會。潘智鍵指張會退出委員會可能係唔想自己因為還押，而影響到委員會嘅工作，至於張未來會否辭去屯門區議員一職，潘就話唔清楚喇。

東網