標題: 9月傳已離港 郭子健證實身處英國成立新組織 [打印本頁]
喺區議員離職潮後，多人先後離港赴外國。其中曾被傳早已唔喺香港嘅葵青區前區議員郭子健，尋日(7日)就喺Facebook證實自己已身在英國，並於與旅居蘇格蘭嘅港人成新組織，並上載上周六(6日)參加咗全球氣候公義遊行相片。
郭子健尋日發貼文話，隨着議員辦事處今個星期正式結束，新嘅計劃隨之開始。佢話成立嘅新組織係為咗凝聚港人之餘，仲要繼續散播同增強當地人嘅拒共意識喎。佢早前參加格拉斯哥全球氣候公義遊行，世界各地環團關注減排目標時，佢亦提醒大家從人權方面，中共屢次唔守承諾，係唔可以相信。佢又指所謂嘅海外戰線唔單止制裁中國，宣揚拒共理念係作為香港人身處自由世界嘅應有之義，真誠向每一個人傳達訊息。
對於突然離開香港，佢就對於未能同街坊一一道別感抱歉，亦唔可以見證議辦最後嘅時光，願將來能夠同大家相聚。其實郭自7月就曾缺席區議會會議，喺9月更有消息傳出郭已離港，喺政府公布區議員宣誓安排後，佢亦表明唔會宣誓同辭職，最終被取消議席。
東網