標題: 政壇：「獵首行動」短片 ICAC拉貪曾 [打印本頁]

---

煲呔曾貪盡海陸空、由省港澳歎到泰國布吉，利益輸送同貪腐醜行經東方報業集團不畏強權踢爆後，公眾既憤怒又怒其不爭，網上湧現大量改歌、改圖嘅創作宣洩不滿，近日仲有人改埋影片，惡搞咗一條名為《ICAC獵首行動》嘅短片，所謂嘅「獵首」，就係廉政公署捉拿涉嫌利益衝突嘅特首，片中仲似層層咁有職員拉咗煲呔曾添。

呢段正片嘅製作非常認真，剪輯咗唔少新聞報道同片段外，仲加插之前一套有關廉政公署嘅電視劇片段入去，最重要當然就係引用媒體嘅連串獨家報道啦，令到成段短片更加具說服力同完整性，可謂鐵證如山。短片用煲呔曾之前喺一個訪問節目中話，退休後如果可以買到間同禮賓府廚房一樣咁大嘅屋就心滿意足開頭，跟住轉到煲呔曾接受富豪提供海陸空款待嘅畫面，包括貪曾乘搭富豪私人飛機及豪華遊艇，出席澳門賭場春茗嘅相等。

連串貪心惡行後，劇情進入廉署立案調查煲呔曾，片段就係一套講述廉署行動嘅電視劇，製作人剪片功力唔錯，劇情絲絲入扣，入木三分。最後就係大批廉署調查員去到背景疑似港澳碼頭嘅地方捉拿煲呔曾，就連呢段都食埋煲呔曾上富豪遊艇住宿兼飲飲食食嗰條水，揶揄佢澳門一歸就落網。

天怒人怨  勁多人不滿

最後咪係煲呔曾畀人落「孖葉」拘捕囉，呢個時候，片中配埋佢獐頭鼠目、面容扭曲嘅照片，真係像真度十足，下一站係乜……就要讀者自己領會喇。段片吸引唔少市民觀看，皆因講出製作人同好多市民嘅心聲。講真吖，網民咁好心機剪段片出來，講到底都係因為勁多人不滿煲呔曾涉嫌貪污瀆職，搞到天怒人怨，究竟佢仲要厚顏無恥到幾時先至肯落台呢？

http://the-sun.on.cc/cnt/news/20120310/00408_001.html

ICAC獵首行動（惡搞曾蔭權 / 足本）


ICAC獵首行動（惡搞曾蔭權 / 精華版）