歐國盃：唇語專家爆腦殘問候球迷

JoeMoney

[轉載 ORIENTAL DAILY NEWS]  


歐國盃：唇語專家爆腦殘問候球迷
2012/06/20


  入完波口噏噏　隊友出手封嘴

「巴神」爆粗吐烏氣！意大利射手巴洛迪利今屆嘅表現一直飽受批評，佢喺昨晨對愛爾蘭後備登場終於倒掛入靚波，總算吐氣揚眉！不過「腦殘」死性不改，佢建功後疑似激動發癲爆粗，雖然邦路斯「作出掩護」，但巴洛迪利仍然畀唇語專家踢爆佢係爆緊粗，「問候」噓佢嘅球迷！

    全場被喪噓 轟入世界波


頭2場分組賽都正選上陣嘅巴洛迪利，今仗後備落場反而有貨交。「巴神」雖然喺75分鐘先入替卡斯辛奴，但喺短短15分鐘內，佢已經有4次射門，臨完場前更喺禁區內「車身」射入世界波，獲意大利傳媒一致激讚。



可能「腦殘」實在壓抑得太耐，佢入波後居然兇神惡煞咁向住愛爾蘭球迷席大叫，隊友邦路斯見唔對路，一個箭步標前掩住「巴神」個嘴，如果唔係，「巴神」隨時畀歐洲足協重罰都似。



「醒目仔」邦路斯喺賽後扮傻，話巴洛迪利當時講英文，所以佢聽唔明喎，不過意大利一個電視台嘅唇語專家就踢爆「巴神」其實係爆緊粗，大叫「Son of txx bxxxx」！當時「腦殘」面向住由佢落場開始就噓聲不斷嘅愛爾蘭球迷，擺明係想報復啦！