歐國盃：世紀波膽落空 西意攜手出線

JoeMoney

[轉載 ORIENTAL DAILY NEWS]   


歐國盃：世紀波膽落空 西意攜手出線
2012/06/20


保方感激西班牙打真軍

歐洲國家盃C組賽最後一輪比賽，克羅地亞對西班牙並未有開出賽前吹到行嘅世紀波膽2比2，最終西班牙憑捷西斯拿華斯取得入球奠定1比0勝出，兼以首名躋身八強。而意大利亦做好自己本分，以2比0擊敗愛爾蘭，以C組次名進入8強淘汰賽。



西班牙眾將賽前向全世界承諾會以勝利為目標，而「鬥牛勇士」果然講得出做得到。難怪意大利隊長保方賽後多謝西班牙夠正氣，令到2比2波膽未有開出。

    04年曾被默契波淘汰


於04年歐洲國家盃，因丹麥及瑞典於最後一輪分組賽開出2比2波膽，直接將意大利踢出局。對於2比2噩夢，相信04年有份替意大利比賽嘅保方、卡斯辛奴及派路都唔會忘記。當年卡斯辛奴聽到丹麥及瑞典打和2比2後，即時哭成淚人，賽後保方仲要上前安慰佢。



事隔八年，卡斯辛奴同樣喺最後一場分組賽取得入球，但唔同嘅係今次保方唔使安慰卡斯辛奴，而係同佢相擁狂歡慶祝晉級。



據悉意大利球員喺比賽期間唔知道「西克」戰況，坐喺後備席嘅職員及球員，全場都冇出過聲。而中場馬治斯奧表示比賽尾段意大利取得角球後，見到門將保方好似想衝上前助攻，令佢以為「西克」真係打默契波，後來先知自己太過敏感。



意大利領隊柏蘭迪利於比賽進行期間未有交代「西克」戰況，就係想球員專心比賽，如今成功晉級，柏蘭迪利可謂鬆一口氣。門將保方更表示要多謝西班牙講得出做得到。




基亞連尼拉傷聽返歸


不過，意大利未踢淘汰賽已收到壞消息，因後防大將基亞連尼對戰愛爾蘭時自己拉傷左腿肌肉，隊醫表示傷勢唔輕，就算意大利入到決賽都難以復出。






本報綜合報道